علاقات الحب من طرف واحد

Question

احكوا تجاربكم عن الحب من طرف واحد سواء منكم او من الطرف التاني وكانت نهايتها ايه؟ وازاي تخطتوها؟

Chocolate_15131 🇪🇬 · Answer

حبيت اخو صاحبتي واقدر اقول انه حب من اول نظره كمان ..حبيته من ٦ ابتدائي وكنت بروح المدرسه عشان اشوفه كنت براقبه في صمت كنت بكدب علي نفسي واقول اعجاب بس قلبي كان ليه راي تاني حاليا انا ٢ جامعه ولازلت بحبه نفس حب زمان .. قعدت ٤ سنين بشوفه باستمرار في المدرسه وبعدها مشيت  وقعدت ٣ سنين ما اشوفه ولا اعرف عنه اي حاجه بس طبعا كنت دايما بكلم صاحبتي واقابلها لانها البيست كنت بتشوق جدا لما الاقيها بتحكي حاجه تخصه واعمل نفسي مش مهتمه او عادي بس انا هموت من الفرحه..كنت بغير لما اعرف انهم خرجو مع قرايبهم مثلا او كدا وهما عندهم بنات كنت بولع من الغيره ومش فاهمه ليه .. الاول كانت ردات فعلي غبيه وكان بيبان فعلا اني بحبه لاني كنت صغيره ف مرحله اعدادي وهكذا بس حاليا بقدر اتحكم في نفسي شويه الا لو شفته ..مره شفته صدفه حسيت ان الارض مش شايلاني وكنت بترعش مش فاهمه كل دا ليه برضو .. كذا مره عنينا تيجي في عين بعض بالغلط واحنا الاتنين فجأه نلف وشنا الناحيه التانيه..  هو شخص محترم ومش بيكلم بنات وانا كذالك يستحيل مهما حصل اكلمه او ارد عليه حتي لو بعتلي فولو او واتس او هكذا وانا عارفه انه مستحيل .. وانا في المدرسه لما كنت ببقي طالعه الباص كنت بحس ان في حد بيبصلي وكان بيبقي هو فعلا بس انا مكنتش ببصله ولا بتكلم ولا هكذا ..وها انا بقالي ٩ سنين بحبه في صمت لحد ما اشوف القدر هيوديني لفين....

Orange_12285 🇪🇬 · Answer

أكتر شئ متعب بجد وبيسحب منك طاقة رهيبة 
حرفيا الحب من طرف واحد بيقطع القلب بجد بتحس انك بتموت الف مرة فالدقيقة احساس وحش اوي انك تحب شخص جدا وعارف كل تفاصيل حياتو وهو ولا هنا اصلا الاصعب بردو لما تكون عارف ان مش ليك لانو ولا بيحبك وكمان انو من عيلتك ولا عارفة اتعامل  معاه طبيعي وبالذات لما عرف اداني وش عشان ابعد عشان مش احبو اكتر ودة كان طلبي فعلا 
متخيلتش ان يكون طلبي دة هيوجعني اوي كدة بس دة اعتقد الصح عشان مش نهزر ونتكلم واحبو اكتر اه سمع الكلام وبقا مديني وش بس كبر فنظري بعد حجات كتير اضايقت منها بس دافع عني 
انا بقيت كل يوم مش قادرة قلبي بيوجعني جدا داخلة ع ١١سنة حب ومش عارفة اتخطاه كل يوم حبو بيزيد فقلبي انا فعلا اجهدت من الموضوع دة بشفق بجد ع اي حد عاشو او لسة عايش في بجد الحب دة وجعع موت بالبطئ حرفيا

Apple_16116 🇪🇬 · Answer

الموضوع منتشر انه عادي  وبتاع بس بجدالحب اللي بجد هو دا اللي المفيهوش هزار
الموضوع متعب بشكل اوفر وبالذات لو الشخص دا معملش حاجة بس انت بدات تستوعب انه مش هبحصل ف نفسيتك بتتدمر وبتخش فحالة من الصدمة مع ان الشخص دا معملكش حاجة 
ولو الشخص دا بقى اصلا كويس ومفيهوش غلطة بس مينفعش عشان حرام وهو اصلا ميعرفش ف دا بقى الوجع اللي بجد اللي بيجيب تروما وبيوجع جامد 
بس عشان الشخص دا اصلا كويس ومحترم واللي مانع انه حرام ف بنحاول نتخطى دا بقى كفيل اني اقعد طويل عمري مش شايفة غيره ومش بفكر غيرفيه ومش بنعرف نتخطى عشان مفيش سبب فيه يعني هو اصلا شخص تحفة بس مينفعش بس بردو مش عارفين نتخطى

Tomato_25656 🇪🇬 · Answer

اسوء حاجة بجد والاسوء منه أن يبقي ف علاقه بينك وبين الشخص دا بس مش حب .بس يبقي انت قلبك كله ليه واه بقا لما تبقي فاكر نفسك اسبشيال وانت عادي جدا جدا ف حياته وبالعكس هو راح كمل حياته وانت متعرفش وبتفكر لسه ف انك ترجع علاقتك بيه  
*خدت اكتر من 5 سنين بتعافي والله* والحمد لله ربنا اكرمني بالاحسن منه بس كل أما افتكر بقول ازاي قعدت الوقت دا ف غفله كدا

Olive_25634 🇪🇬 · Answer

حبيت واحد قريبي وانا وهو اصلا في الاول كنا بنكره بعض ف هو اصلا مش بيحبني واكيد مش هكلمه لان ده حرام بدعي علطول ربنا يهديه ويبقي من نصيبي

الموضوع صعب لان اهلي اصلا حالفين م هيجوزوا حد فينا من قرايب يعني حتي لو طلع بيحبني لسه فيه مشكله

Potato_25625 🇪🇬 · Answer

اوحش حاجه انك تحب حد وهو مايعرفش انك بتحبو وماينفعش تتكلم معاه عشان حرام انك تفضل متابع اخباره مركز معاه وتفضل كدا ل اكتر من سنتين وفي الاخر تعرف انو خطب اكتر حاجه بتزعل انك مش عارف تمنع نفسك من انك تفكر فيه

Marshmallow_25575 🇪🇬 · Answer

الاوحش من الحب من طرف واحد هو الطرف التالت مردغانه والله 
تكوني بتحبي حد ومتعلقه بيه وهو بيقول انه بيحبك بس هو متجوز ف انتي طرف مرمي كده ع جمب اتشاف فيكي حاجة مختلفة ف انتي قاعدة ع دكة البدلاء ف الاحتياطي ولما تكوني هتمشي طلبك ده يترفض وتتثبتي بكلمتين ويتقالك خليكي بحبك ماتبعديش ولما الموضوع اتكشف اتخلى عنك علشان مش قادر انه يواجه طلاق ومشاكل ويخربيته اللي ماكنش مرتاح فيه
ااااه مني لله بجد بختار اختيارات بشعة اوي وقلبي بيتعلق بيها

Avocado_26043 🇪🇬 · Answer

تعارفنا كان غريب ولما قالي انه بيحبني كان الموضوع اغرب مكنتش مصدقاه كنت صغيره مش فاهمه بيحبني ليه قدمتله ايه عشان يحبني حتى ميعرفش شكلي ايه عشان اقول بيحبني عشان شكلي المهم بعدت فتره ورجعت واحنا صحاب بس مفيش بينا حاجه وقتها كنت مكملتش 17 سنه دخلت 3 ثانوي خلصت لقيته بيفتح معايا موضوع الجواز في الوقت ده انا كنت معجبه بشخص تاني خدت الموضوع هزار وقفلته كل فتره الموضوع يتفتح واقفله بحجة ان احنا مش هننفع لبعض لحد ما جه في مره قالي انا مبقيتش عارف احب حد تاني بقيت بلف وارجعلك في الاخر وشيلنا بعض ولسه بيراقبني ولسه حاسه بالذنب ومش عارفه اتخطى الموضوع ده ازاي خصوصا انه قعد 3 سنين يحبني ويحاول معايا وانا مقدرتش احبه دلوقتي انا في 3 جامعه وشيلنا بعض من 4 شهور تقريبا بالمناسبه انا كمان قعدت احب شخص سنتين ونص من طرف واحد وهو ميعرفش اني بحبه 😅

Coffee_26073 🇪🇬 · Answer

بعد كل الدعم الي قدمته ليه و بعد كل حاجة بجد بمنتهى البساطة متمسكش بيا لما قولتله ان انا شيفاك اكتر من اخ و صاحب هو حتى معتذرش ع  mixed  sign ولا شكرنى ع ان انا دايما كنت بقدر الظروف الي هو فيها و المشاكل و كنت الوحيده الي بدعمه حتى اكتر من اهله فيه تفاصيل كتيره جدا جدا ازاى بجد محسش باى حاجة من ناحيتى و لا حتى اتعلق بيا كصاحب كانه مصدق ان انا همشى من حياته مع انى متاكده ان انا كنت الشخص الوحيد الى ف حياته يعني لا عنده اصحاب لا ولاد ولا بنات ف ازاى كدا بجد

Coffee_26073 🇪🇬 · Answer

الي خلانى اقرر ان كدا كفايه حاجتين انه بقي ضغطنى بطريقه مش طبيعيه عايزنى معاه 7\24 ع الواتس ع الفون معملش حاجة من غير ما اعرفه و لا كانه خطيبي و ان لان انا بحبه سيبته عشان ده حرام و عك و ان ربنا يجمعنى بيه ف الحلال بس هو بمنتهى البساطة قالى شوفى القرار الي يناسبك و اعمليه الي هو بجد ازااااى بالسهوله دى بجد ازاى

Donut_26080 🇪🇬 · Answer

من حوالي سنه وقعت ف حب واحد مشهور وانا عمري م حصلي حاجه زي كدا او اعجبت بجد اصلا سواء مشهور او معايا ف الحقيقه بس دا اول م شوفته حسيت انه خلاص هو الشخص دا هيكون من نصيبي مع العلم ان هو ميعرفش اني عايشه ع الكوكب اصلا وفضلت كدا كتير بجد لو قال انه زعلان افضل انا كمان زعلانه ومتضايقه والموضوع كان بيقلب تعب جسدي كمان من كتر مانا زعلانه علشانه لغايه م حسيت ان ايه الهبل اللي بعمله ف نفسي دا ازاي بعمل ف نفسي كل دا علشان شخص ميعرفش اني عايشه ف الحياه بجد انا استاهل انا اللي اتحب والدنيا كلها تجيلي لحد عندي وانا اللي افكر اوافق ولا لا..منكرش اني لسه بفكر ف الموضوع ساعات بصراحه بس بعتبر انها لحظات فراغ عاطفي وخلاص هتروح لحالها

Chocolate_25696 🇪🇬 · Answer

كان إعجاب  بدأ من٦ سنين ،فضلت معجبة بيه ٤ سنين ،بدأت بأنه اتحكالي عنه كتير ولقيت فيه صفات أي حد يتمناها ،الصراحة مكنتش بقدر أمنع نفسي أكتب عنه على ورق ،كنت دايماً بفكر فيه مهما كانت ظروفي ،مشغولة أو فاضية،محدش كان يعرف عن إعجابي حاجة حتى أقرب حد ليا محكتلوش ،فضلت بعاني لوحدي،بالرغم من اني أعجبت بيه  في سن صغير الا اني دلوقتي كبرت ولسة نفس الصفات معجبة بيها وبدور عليها ومش بتتغير بتغير شخصيتي،

كان بيسافر دايماً وكنت بستنى اللحظة اللي يرجع فيها ولما كنت اشوفه كان بجد شعور غريب غريب أوي عمري ما حسيته قبل ولا بعد لما شوفته،كان يفتح معايا كلام بحُكم ان بينا معارف مشتركة ،بس أنا كان عندي مبدأ ب(شروط الاختلاط )يعني كان كلامي جاف ،الرد بكلمة ،مفيش خضوع بالقول ،الحمدلله كنت معتبرة قدرتي على فعل ده نعمة في زمن الفتن ،

بس أوقات دلوقتي بيجيلي الشيطان يقولي لو كنت اتكلمت وعرف عني أكتر جايز كان حابني،..وبعد سنين من الانتظار ان أي حاجة تحصل ويبقى من نصيبي ،أتصدم بقراية فاتحته على قريبته ،اللي عرفت بعدها انها كانت بتحبه وبتدعي في صلاتها يكون من نصيبها ،..وعلى الرغم انه كان بيحب حد قبلها بس في الآخر بقى من نصيبها ،

وقتها قلبي وجعني أوي ،وندمت على خوفي بإني أدعي باسمه في صلاتي ،.. خطب بعدها وعجّل بكتب الكتاب ،وفرحه بكرا وأنا من أهم الحاضرين هكون كدابة لو قولتكلوا اني متضايقة بقا وقلبي واجعني زي زمان ،بس الحمدلله انا عديت المرحلة دي واتكلمت مع نفسي فيها كتير أوي بس برضو هكون كدابة لو قولت ان الموضوع لسة مش مأثر فيا ومش مستوعبة انهم هيكونوا مع بعض سوا بكرا ...بس حقيقي بتمناله السعادة وان يومهم يمر بسلام ويفرحوا ،بالذات هو ..بتمناله كل السعادة حقيقي