هل تعرضت للتنمر بسبب وزنك؟

Question

شاركونا تجاربكم مع مواجهة المتنمرين بخصوص وزنكم.

Apple_38269 🇪🇬 · Answer

كتييييير😂 بسبب اني كنت رفيعه مع ان جسمي ناقصني كام كيلو واوصل الوزن المثالي بس هنا بيحبوا الواحده المليانه 
بالذات القرايب العقارب لدرجة كرهت اروح اي تجمع عائلي بسببهم وكنت بتكسف من تلقيحهم خصوصاً ان بناتهم بصورم وبيقعدوا يقولوا الراجل هياخد الواحده اللي عودها فرنساوي او رفيعه يعمل بيها ايه وكلام زباله كدا وكنت بزعل، وهما اصلا شبه البراميل ونفسهم يوصلوا لجسمي
فوقت من كل دا لما لقيت نفسي تعبت من الزعل وكل يوم عند دكتور بعالج حاجة بسبب الحزن والقلق بعدها قعدت كدا وسألت نفسي انا ايه اللي جايلي يعني من كل دا غير تعب اهلي مصاريف علاج كل شوية؟ ميولعوا بجاز وبدأت احب نفسي اوي وفي اي قاعده بقيت ارد واقول بحب نفسي كدا كل حاجة فيا تحفه وعجباني واللي مش عاجبه اقرب حيطة ويخبط راسه فيها واردلهم التنمر من تحت لتحت بقوا يخرسوا حتى ام صورم اللي بتغير مني بتغير عشان انا احلى منها و الكل بيقولي اني مش هيبان عليا سن او  كبر ابداً عشان ملامحي وجسمي صغنن وشكلي عسول في حين هى ٢٢ سنه زيي برضو واللي يشوفها يقولها عندها ٣٠ ومخلفه ٤ بقت تتقهر وتسكت 
انا والله العظيم ما بحب اتنمر ولا اجرح حد انا هاديه وفي حالي دايماً بس اتعلمت اللي ييجي عليا انا واخواتي امسح بكرامته الأرض، العين بالعين والسن بالسن والبادي اظلم 🫴🏻😘وكل يرى بعين طبعه يعني الناس اللي قلبها نظيف هتشوفك عسل والناس اللي قلبها اسود هتطلع فيك عيوب الدنيا فطظ فيهم كلامهم مبيجيبش غير ورا ، طولت بس حاجة اخيره😂 لما قويت نفسي في الحته دي وبقى ميفرقش معايا رأي حد جسمي بدأ يتعافى تماماً وبقيت ازيد واحده واحده وشكلي عسول وحاجة تحفة اوثقوا في نفسكم يشباب♥️

Apple_34034 🇪🇬 · Answer

عايزة اخس بتعرض كتير اوي للتنمر من اهلي وصحابي والناس الي في الشارع 
برغم ان جسمي مش وحش للدرجة المبالغ فيها دي بس هم تعبوني بجد
كل ما اقول اخس برجع تاني
بس انا عايزة اخس عشان نفسي ونفسيتي وبس

Peanut_41635 🇪🇬 · Answer

كنت بتعرض للتنمر زمان كان الكلام بيجرح حصلي شويت مشكل وكنت بشرب بس قليل بقيت بشرب كل حاجه وقعد ب التلات ايام من غير اكل علي شرب مخدرات بس لحد مبقيت هيكل عضم وكلو اتنمر عليا برضو انا حليا ولا تخين اوي ولا رفيع بس معتش بيفرق معيا كلام حد

Apple_38785 🇪🇬 · Answer

يااه كتير بس مبقتش بتأثر يعني اتعودت لان التنمر كان بييجي من اللي جوة البيت بس اللي برة طول عمرهم يقولولي جسمك حلو وبشوف بنات نفسها جمسها زي جسمي  الا اهلي شايفين دايما اني وحشة ومحتاجة ازيد شوية

Mango_28661 🇪🇬 · Answer

اتعرضت كتير اوي بسبب اني رفيعه و بابا يقعد يقولي كلي كتير عشان تتخني شويه زمايلك احسن منك اما ماما هي متفهمه ان دا بسبب التوتر و ان انا ثانويه عامه و اي حد من قرايبي يشوفني يقولي انت هتنقرضي قريب 😂
باخذ الموضوع بهزار عشان نفسيتي لان انا مش ناقصه

Chocolate_44139 🇲🇦 · Answer

انا كنت طفلة وزني عادي بس لما وصلت ن مرحلة الثانوية الإعدادية بديت اسمن شوي كانوا اخوتي يلقون نكت علي وزني و عند الحجر الصحي بمرحلة الكورونا وزني زاد جدا ابي كان منزعج من هذا و أمي كذلك فأدخلوني لنادي رياضي ضعفت ٢٥كيلو لكن لظروف لم أعد أذهب للنادي فسمنت أكتر . أصبحت العائلة بأكملها تتنم.ر على وزني تحت شعار نمزح معكي فقط .فبمرور الوقت ثقتي بنفسي زادت أصبح كلامهم لا يأثر علي بل زاد من حبي لنفسي و أيقنت أنه يجب أن تحب نفسك كائنا من تكون .

Banana_10453 🇸🇦 · Answer

تعرضت للتنمر اكثر من مره لكن صلت لمرحلة من عدم الاهتمام ف لما شخص تنمر علي و قال كأني حامل في الشهر التاسع قلت له الن الوزن الزايد يقل لكن القصير مايطول و بهذي الطريقة خليته يسكت

ف مهما تعرضت للتنمر لا تسكت عن حقك

Chocolate_44057 🇪🇬 · Answer

من صغرى مكنتش الطفله الرفيعه 
بس عمرى ما تقبلت شكلى بسبب التنمر حتى لو بالهزار طول الوقت 
فكنت بعمل دايت من الاعدادى وادينى اتخرجت ولسه فالدايرة دى مش بتخلص ابدا 
بخس واتخن بسرعه ممكن اعمل دايت ومخسش اصلا 
كانت اكبر صدمه عندى 
لما اتخطبت لحد بيحبنى وكنت وقتها خاسه كمان وزنى زاد شويه بعدها ابتدت امه تنصحنى اخس وانى مهمله فشكلى وهو كان طول الوقت بيلقح 
لما واجهته وسألته عجباه ولا لا .. قال انى ادرى بشكلى هو ميعرفش 
وبعدين قالى انه كان ناوى يغيرنى ولازم اتغير عشان الحب كدا 
ولازم افضل حلوه دايما حتى لو حملت لانه بيقرف من الوزن 
المشكله انه كان بيحاول يتقدملى ٣ سنين متواصلين ولما وافقت
 بيه عمل كدا 
ليه جالى طالما مش عجباه من الاول وكسرنى كدا 🙂

Strawberry_38564 🇪🇬 · Answer

انا من صغري و انا تخينه و كنت دايما في المدرسه كنت اكتر واحده حجمها كبير في  وسط زمايلي  و لما  وصلت ثانوي  بقى في بنات معايا بردوا احجامهم كبيره زيي و بعد ما اتخرجت كان في كذا حد اتكلم معاه و يسبوني بسبب وزني الي هو انتي يا تخسي يا مش هنكمل كنت احاول اخس بس بردوا مش بعرف كنت بلبس لبس مش لايق عليا و بيبقى شكلي بيه وحش و مش حلو و مش بعرف الب الطرحه كويس  و مكنتش متقبله شكلي خالص  و حاولت اخس كتير و مش بعرف 
بس مع الوقت تقبلت شكلي و جسمي  مع العلم انا طويله و جسمي مقسم كيرڤي زي ما بيقولوا و بدأت البس لبس بيليق ع جسمي  و يكون في نفس الوقت محترم و واسع و بقى الكل بعد ما بيقولي خسي بقى يتقالي  شكلك حلو احلى حاجه فيكي بتعرفي تلبسي و شكلك بيكون حلو و مترتب  و بجد بقيت فخوره اوي في نفسي  و دلوقتي  انا مخطوبه و هو متقبلني زي  ما انا و هو ايوه بيقولي  خسي شويه بس  بحاول بردوا و اما جيت قولتلوا مش عايزه اخس انا متقبله نفسي كدا قالي  خلاص  انتي  كدا او كدا حلوه