ازاي اتغلبت علي خوفك انك تثق في حد

Question

احكي قصتك مع فقدان الثقة في الناس اللي حواليك او الجديدة وايه سببها وازاي اتغلبت عليها

Coffee_28425 🇪🇬 · Answer

عمري ما خوفت من حد و قدرت اثق فيه عندي مشكلة مع الخوف كبيرة جدا احيانا بحس انه هو اللي بيحركني هو اللي بيخليني اخد خطوات و هو اللي بيوقفني مكاني شعور سئ بس مش بعرف اعيش من غيره و فهمت و عرفت ان طول منا خايفة من حد عمري ما هقدر اثق فيه ولا هكون مرتحاله و كل شخص خوفت منه استنيت منه موقف يطمني اثبتلي ان خوفي منه في محله و عملني اني اصدق حدسي ان الثقة و الامان وجهان لعملة واحدة بس لسة مطبقتش الدرس😂 بس بجد طول منا خايفة من اللي قدامي و مش واثقة فيه مش هحاول و لا اجرب اخوض في بحره عشان اثق فيه محدش يستاهل

Mushroom_28953 🇪🇬 · Answer

محتاجه اوصل لشعور الثقه مع حد اغمض عيني و اطمن عمري م عرفت اطمن لحد علشان اثق فيه
ناقصني الامان و الحب و بعدين يبقي في ثقه
معتقدش ان حد ع الابلكيشن ده عنده ثقه في حد كلنا صعب نثق في اللي حولينا حتي بمجرد الفضفضه بنخاف

Pineapple_25718 🇪🇬 · Answer

عموماً عادي انا مش بثق ف اي حد بسهوله كدا او مش بثق ف حد اللي هو عادي مش هخلي ليك اهمييه قصوي ف اللي انا احتاجك ف يبقي عندي ثقه فيك انك مش هتخذلني 
لكن الحمدالله ربنا رزقني بشخص وثقت فيه لدرجت اني عملت مصيبه تخص الشخص دا وحكتاله ووقف معايا ومخدش اي موقف وحش وتقريباً مش هيجي اسواء م الموقف دا ف دا خلني اثق فه اكتر واكتر

Kiwi_29064 🇪🇬 · Answer

فقدان الثقه في الناس هي من اصعب الحجات الي ممكن الانسان يعدي عليها في حياته، بتخلي الواحد بدون ادراك بيتصرف تصرفات كتير لا أراديه بناء على احساسه وعلى عدم قدرته على الاعتماد على الناس او الوثوق فيهم وفي كلامهم وتصرفاتهم، انعدام الثقه دوامه الي بيدخلها بيعاني كتير عشان يخرج منها، ولو جه شخص واحد وثقنا فيه ومكنش اهل للثقه، بيبوظ كل مراحل التشافي الي تعبنا عشان نوصلها.

Mango_28076 🇪🇬 · Answer

هو متغلبتش بس حبيت أشارك😅
هو طبيعي ان مش بعرف أثق فى الناس بسهولة؟
يعني بحتاج وقت و مواقف كتير جدا، و ممكن فى الآخر موصلش للثقة حتى
انا شخص معندوش صحاب عشان مش بعرف اقرب من حد، مش بعرف أثق فى الناس، حتى لما ببقي متضايقة او زعلانه مش بعرف احكى لحد، حتى أهلى مش بعرف اتكلم معاهم فى حاجة، ده بيخليني أغلب الوقت يكتم فى نفسي و مخنوقة على طول
لكن عندى صديق واحد، هو الوحيد اللى بعرف اتكلم معاه نوعا ما، لكن برده بحس انى مش واثقة فيه، رغم انه عدينا بحاجات كتير تثبت انه أهل للثقة، بس انا مش عارفة ازاى اثق فى حد، نفسي أوصل مع حد لدرجة الثقة العمياء زى ما بيقولوا، مش عارفه هى دى مشكلتى و لا هى الثقة العمياء دى خيال😔

Banana_29935 🇪🇬 · Answer

سلمتها لله
و انا في اعدادي حد معايا في المدرسة عمل حساب فيك و قعد يتكلم معايا كتير منه على انه بنت و كان بيبعتلي صور مش كويسة و بالتدريج خلاني ابعت انا كمان صورة و قفل على كدة

بعدها ب ٣ سنين لما حولت مدرسة تانية الناس من المدرسة الأولى عملوا جروب كبير ولاد و بنات كلهم عارفني و فيهم صحاب قريبين ليا و حد بعت الصورة دي في الجروب. كان احساس عمري ما هنساه لما شفت الصورة و شفت بنات بتمشي من الجروب و ناس بتعلق على الموضوع، طبعا خرجت علطول بعدها

الناس من المدرسة التانية عرفوا و خسرت أغلب اللي كنت اعرفهم حتى اعز اصحابي وقتها، و في ناس لما كنا نتكلم ولا نهزر شوية بتريقة على بعض يقوموا جايبين سيرة الموضوع ده لمدة كذا سنة كمان بعد ما الموضوع اتعرف

لما دخلت جامعة كنت بتعامل مع الناس على اساس اني كدة كدة هخسرهم لأني كنت بقول مسيرهم هيعرفوا و مسير الناس كلها هتعرف، و لكن خلصت جامعة و دخلت جيش و اشتغلت و الدنيا مشيت الحدلله

اكتشفت ان الدنيا مش واقفة عليا، و دي حاجة انا عملتها لما كنت صغير نسبيا (طبعا هي حاجة غلط ) فا مش جريمة و مش مستاهلة اقطع نفسي كل ده عشانها

انا كنت ضايع خالص من ناحية الدين و مع الوقت كنت بقرا و بدور في صميم الدين عشان كان عندي شكوك، الحمدلله ده اللي صلح الموضوع عندي إلى جانب مشاكل تانية

على قد منا بكره الوقت ده من حياتي على قد منا مكنتش هبقى احسن منغيره، اه انا مبثقش في الناس كلها، بس بثق في ناس معينة أوي و بدون سذاجة، و لو اتخذلت من حد انا واثق فيه، أو أسوأ، اتعرف تاني القصة دي للناس اللي في حياتي دلوقتي، فا انا عارف انا اللي هخسره بعدها ده الخير ليا، و كدة كدة انا بشتغل على نفسي كا شخص اني اكون احسن فا مش مهم الناس شايفة ايه، المهم ربنا يكون راضي عني

Biscuit_27604 🇪🇬 · Answer

كنت هتخطي بس محصلش
   كنت لما باجي احكي حاجه عني بحسهم مش مهتمين فبقيت بسمع اكتر ما بتكلم ومع الوقت بقيت مبعرفش اشارك عن نفسي حاجه حاسه هتقل عليهم بس ومحدش مهتم او بحس الردود بارده او هبقي مثيره للشفقه بقي المهم وثقت في حد من صحابي وبالصدفه هي  عرفت حاجه عني انا مشاركتش بس هي عرفت وقولت بس فرصتي اني ادي ثقه لحد واشارك بقي للعلم صاحبتي كانت بتعيش نفس الوضع فتوقعت تدعمني تساندني تساعدني اي حاجه بس هي كانت بتهرب وبتحاول تبين ان مش هتقدر تساعدني بس هي كانت تقدر ودي الوحيده فعلا اللي كنت مستعده اشاركها كل حاجه بس خذلتني فحسيت مبقاش في داعي وبس هي كانت اقرب حد ليا ودلوقتي هي قريبه بس مش قادره اشوفها زي الاول وانا حد علاقاته الاجتماعيه محدوده فمش سهل الاقي حد اثق فيه للعلم عمري ما سيبتها لدماغها ساندتها في اصعب ايامي ودعمتها فتوقعت نفس الشيء منها ووالله كنت هديها الامان هي طيبه اوي وانا بحبها اوي بس هي مبقتش في عيني نفس الشخص حاسه اني اتخذلت منها اوي

Peanut_30695 🇪🇬 · Answer

ولله الواحد لحد دلوقتي مبيثقش ف حد الثقه الكامله رغم اني عندي صحاب وبحبهم فشخ و بيحبوني فشخ بس برضو مش مدي الثقه ال ١٠٠٪؜ وانا شايف ان دا الصح الثقه المطلقه غلط لازم تسيب ذره شك علي الاقل حتى لو ف اقرب الناس لان احنا مش ملائكه فا بس انتو ايه رايكو😂

Waffle_30454 🇪🇬 · Answer

كان عندي مشكلة مع حد قريب مني ف انو مش بيثق ف الناس وانا عانيت عشان اخليه يثق فيا 
بعدها بقيت مش عايزة احمل اي حد ذنب حد تاني وببدا علاقة جديدة عادي وكلي حب للشخص بعد م اتاكد انو كويس ويستاهل ومش بحملو غلط الي قبلو بس بتجنب اني اتوجع تاني

Cherry_33009 🇰🇼 · Answer

طول عمري ماكان عندي مشكلة بالثقة بحد، لأني كنت بفكر كل الناس متلي لو حبوا حدا ما بيأذوا، لحد ما بديت اشوف الخيانة و الغدر بعيني من ناس كنت معطيتهم كل الثقة، حالياً ما عندي ثقة بأي احد للاسف و دايماً بكون عندي خوف انه هالشخص ممكن ما يكون قد الثقة، و هالشي زرع فيني وولدلي عادة سيئة و هي اني صرت دايماً بمسك على الناس اشيا بالصوت و الصورة، محادثات، فيديوهات، صور، اشياء ممكن توديهم ورا الشمس، ما بأذيهم فيها بس بخليها عندي احتياط، في حال فكروا يعملوا شي مؤذي لي اعرف اوقفهم فوراً و احمي نفسي، انا بعرف اني مستحيل استخدم هالاشيا فعلياً و مستحيل ااذيهم بس الاحتياط واجب🤷🏻‍♀️